09.01.2024.
ҚР Ғылым және жоғары білім министрі Саясат Нұрбек:
"Армысыздар қадірменді оқырмандарым! Бүгінгі дәуір ғылым мен білімнің тасы өрге домалап, ізденемін, үйренемін деген жанға сәуле шашқан шуақты кезеңнің бірі екендігі сөзсіз.
Білімнің өлшемі мен ғылымның құны қашанда бағалы. Осы ретте өздеріңізге Мұхтар Әуезов атындағы Оңтүстік Қазақстан университетінің жас ғалымдарының бірқатар жетістіктерін баяндауды жөн көрдім.
Баршаңызға белгілі, қазіргі таңда ғылымды қаржыландыру көлемі артып, ғылыми жобаларды коммерцияландыру бірнеше есеге өсті, ғалымдардың жалақысы еселеніп, кадрлық әлеуетті нығайту жұмыстары қарқынды жүргізіліп келеді.
Auezov University ғалымдары орындап жатқан ғылыми жобалардың қаржы көлемі 5 млрд. теңгеден асты. Бұл көрсеткішке жас ғалымдардың қосқан үлесі зор деп санаймын.
Өткен жылдан бастап жас ғалымдардың ғылыми зерттеулерін қаржыландыру бағытында өткізілген «Жас ғалым» конкурсында университеттің жас ғалымдары 26 жоба ұтып алды, оның ішінде:
– жас ғалымдарға арналған гранттық конкурс бойынша – 5 жоба,
–️ «Жас ғалым» конкурсы бойынша – 21 жоба. Яғни, жас ғалымдар жобаларының қаржы көлемі – 624 млн. теңгені құрап отыр.
Қазақтың заңғар жазушысы Мұхтар Әуезов бір сөзінде: «Ғылым мен мәдениет барлық дүниенің алтын алқасы болып отыр», – деген болатын. Ұлы жазушының аманатына адалдық танытып, ғылым шыңына ұмтылған жас ғалымдардың ізденістеріне толымды табыстар мен сарқылмас сәттіліктер тілеймін!"
Comments