Фотографтардың қатарында сәттерді түсіріп қана қоймай, оқиғалар тудыратындар да бар. Осындай таланттардың бірі – Учкудук қаласында туған (Өзбекстан) 21 жасар Данил АКРАМОВ. Ол қазір Астана қаласындағы С. Сейфуллин атындағы ҚазАТЗУ-да оқиды. Оның жұмысы биылғы жылы 35AWARDS халықаралық байқауында «Қалалық пейзаж және сәулет» номинациясы бойынша әлемнің үздік 35 фотосуретінің қатарына енді.
Бұл жетістік жас фотограф үшін алғашқысы емес. Өткен жылы экономика факультетінің студенті Данил Акрамов 35AWARDS қазылар алқасын таң қалдырды және «Атырау көпірі» жұмысымен «Мобильді фотография» номинациясы бойынша әлемнің топ-100 фотографы қатарына кірді. Бұл жұмыс қарапайым Poco x3 Pro смартфонына түсірілген. Данил бұл суретті Instagram-да бөлісіп, көлеңкелердің ерекше ойынын атап өткен танымал фотографтардың пікірлерін алды.
Данил бұл суретті беделді байқауға қатыстыруға шешім қабылдады. Нәтижесінде ол «Мобильдік фотография» номинациясы бойынша топ-50-ге енді (45 341 жұмыстың ішінен), ал автордың өзі өз номинациясы бойынша топ-100 фотограф, Қазақстанның топ-50 фотографы, Астананың топ-10 фотографы тізіміне енді.
«Бұл ең жақсы нәтиже болмауы мүмкін, бірақ мен үшін бұл менің шығармашылығымдағы жаңа және маңызды жетістіктердің бірі, әрі қарай одан да көп болады деген үміттемін», – деп Данил өз әсерімен бөлісті.
Данилдің кезекті жетістігі оның керемет таланты мен кәсібилігін растай түседі. Бұл жолы Данилдің объективіне әйгілі нью-йорктік сәулетші Марк Форнестің «Minima Maxima» инсталляциясы түсті. Сурет қаңтар айында Қазақстанның астанасы Астанадағы ЭКСПО аумағында түсірілген. Бұл нысан Данилді заманауи технологиялар мен жасанды интеллекттің дамуын бейнелейтін ғылыми-фантастикалық көрінісімен таң қалдырды.
Бір қызығы, сурет Xiaomi 13T смартфонына түсірілген, бұл оның «Қалалық пейзаж және сәулет» номинациясындағы ең жақсы 35 фотосуреттің қатарына енуіне ықпал етті. Данил өнер туындысын жасау үшін қымбат жабдық емес, кадрдың сұлулығын жеткізуге деген шабыт пен ұмтылыстың маңызды екенін тағы да дәлелдеді.
35AWARDS 9-шы халықаралық фото сыйлығы әлемнің 174 елінен 465,7 мыңға жуық фотосурет ұсынған 111,3 мың қатысушыны қамтыды. Бұл фотография әлемінің қарқынды дамуын және осы өнердегі бәсекелестіктің артуын көрсетеді.
Фото сыйлықтың қорытындысы бойынша Данил Акрамов «Қалалық пейзаж және сәулет» номинациясы бойынша әлемнің топ-70 фотографы, Қазақстанның топ-10 фотографы, «Мобильді фотография» номинациясы бойынша әлемнің топ-150 фотографы тізіміне енді.
Біз Данилден жеңіске жету жолы туралы айтып беруін сұрадық.
– Сізге суретке түсіруді бастауға не түрткі болды?
– Менің қызығушылығым мектепке бейнетүсірілім жасаудан басталды. Бірте-бірте бейнетүсірілімге деген қызығушылық фотосуретке ауысып, мен 17 жасымда алғашқы кадрларымды түсіре бастадым. Ол кезде менде масштабтау камерасы мен кең бұрышты линзасы жоқ Redmi 7A смартфоны болатын, бірақ ол фотосуреттермен жасаған тәжірибемнің алғашқы құралына айналды.
Мен суреттерімді алдымен Instagram-да жарияладым, бірақ бір күні өзіме: «Бұл әлемге менің суреттерім не үшін керек? Олар көрерменге не бере алады?» деген сұрақ қойдым. Бұл маған көзқарасымды қайта қарауға және менің шынымен құнды жұмыстарыма назар аударуыма ықпал етті. Оларды өңдеуге маған Adobe Photoshop-та жұмыс істеу дағдыларым көмектесті. Көп ұзамай мені әрі қарай қозғалуға шабыттандырған оң жауаптар ала бастадым. Солай түсінгенім – суретке немен түсіргенің емес, оны кім және қалай түсіретіні маңызды. Тіпті бюджеттік смартфонмен де әдемі суреттер жасауға болатынын көріп, мен туған қаламды суретке түсіре бастадым және бұл процесс мен үшін нағыз шабыт көзі болды.
– Суретке түсіру үшін нысанды қалай таңдайсыз? Бұл кездейсоқ бола ма, әлде сіз әдемі жерлерді, ракурстарды, ерекше күн сәулелерін іздеуге уақыт бөлесіз бе?
– Мен әрқашан фотосеруендерім мен коммерциялық түсірілімдерді жоспарлаймын, бірақ кездейсоқ кадрлардың болуы сирек емес. Мен түсірілім объектісін интуицияға сүйене отырып таңдаймын, кейде жолда өзім ұнатқан жерлерге арнайы барамын. Мен әр жерде ерекше нәрсені қалай жасауға болатынын жақсырақ түсіну үшін жергілікті жерлерді мұқият зерттеймін. Кейде идеялар кездейсоқ пайда болады және смартфон әрқашан менімен бірге – бұл мен қай жерде болсам да, ерекше сәттерді түсіруге мүмкіндік береді. Шабыт жетіспейтін кездер де болып жатады, сонда мен зерттелмеген жерлерге баруға немесе таныс жерлерге жаңа көзқараспен қарауға тырысамын.
– Сіз фотосурет курстарынан өттіңіз бе, әлде өз бетіңізбен үйрендіңіз бе? Әлде шабыт пен түсірілімге деген сүйіспеншілік әсер ете ме?
– Мен фотосуретті интернет-ресурстарды пайдалану және тәжірибе арқылы өзім зерттедім. Мен үшін тәжірибе және жеке көзқарас арқылы үйрену – ең маңызды аспект, өйткені тәжірибе арқылы ғана біз бақылау қабілеті мен композиция сезімін дамыта аламыз.
– Шығармашылықтың болашағы жайлы өзекті пікірталас жайында сіздің ойыңыз қызықты. Көбі жасанды интеллект адамды одан біртіндеп ығыстырады деп қорқады.
– Жасанды интеллект — бұл өте пайдалы құрал, бірақ ол адамды алмастыра алмайды. ЖИ-де фотографтардың өз жұмыстарында білдіретін сезімдері мен жасампасыздығы жоқ. Нағыз фотосуреттер эмоцияларды жеткізеді және менің ойымша бұл оларды бірегей етеді. Бірақ ЖИ-дің өнердегі және өмірдегі рөлі арта түсетіні сөзсіз.
– Сіз экономика факультетінде оқисыз, оны бітірген соң мамандығыңыз бойынша жұмыс істеуді жоспарлап отырсыз ба? Ол сізді несімен қызықтырады? Сіз шығармашылық адамысыз, нақты ғылымдарды игеру қиынға соға ма?
– Экономика мені қызықтырады және талдау, сыни ойлау және әлеуметтік байланыстарды кеңейту секілді пайдалы дағдыларды береді. Менің жаным шығармашылыққа ұмтылса да, білім осы бағытта да маңызды ресурс болатынына сенімдімін. Әрбір дағды пайдалы және оны өмірде қолдануға болады. Оның үстіне, мен әрқашан жаңа нәрсені үйренуге ұмтыламын. Экономика маған әлемді әртүрлі қырынан қарауға көмектеседі, ал оқу шығармашылықта да пайдалы болатын көп қырлы мүмкіндіктер ашады.
– Сіздің алдағы шығармашылық және кәсіби жоспарларыңыз қандай?
– Менің жоспарларым — фотограф ретінде өз дағдыларымды дамыту, халықаралық байқауларға қатысу және бүкіл әлемдегі жаңа, шабыттандыратын мекендерге бару. Сондай-ақ, әрине, жұртшылықты таң қалдыратын суреттерді түсіру.
Данил нәтижеге жету үшін оған отбасы, достары мен әріптестері көрсететін эмоционалды қолдау қажет екенін айтты. Әлемнің үздік фотографтарының қатарында лайықты орын алған талантты жас фотографқа одан әрі шығармашылық табыстар мен әсерлі жаңа жобалар тілейміз. Атақты жаттықтырушы Винс Ломбарди айтқандай: «Жеңіс – бұл соңы емес, ол – жеңіске деген ұмтылыс».
Сұрақтарды қойған
Ахан ХАНОВ
АҢДАТПА
Студент экономического факультета КазАТИУ им. С. Сейфуллина Данил Акрамов, приехавший учиться в Астану из Узбекистана, второй год входит в число лучших фотографов мира по результатам крупного международного конкурса 35AWARDS. В этот раз его работа вошла в топ-35 лучших фотографий в своей номинации. Молодой фотограф ответил нашей редакции на несколько вопросов о том, как происходит его становление как профессионала и что он считает важным на пути к успеху.
Commenti