11 қазан күні Қазақ ұлттық қыздар педагогикалық университеттің оқу ғимаратына Күләш Құнантайқызының аты берілу салтанаты және дәрісхананың ашылу өтті.
Күләш Құнантаева – Қазақстан әйелдерінің ішінен шыққан тұңғыш педагогика ғылымдарының докторы, академик. Бүгін отандық педагогика ғылымының дамуына сүбелі үлес қосқан көрнекті ғалым, ұлағатты ұстаз құрметіне «Қазақстандағы білім саласында әйелдердің рөлі» тақырыбында конференция өткізілді. Конференция аясында ғалымның өмірі мен ғылыми қызметі жөнінде баяндама жасалды.
«Күләш Құнантайқызы – менің ғылыми жетекшім. Ұзақ уақыт бойы жанында жүріп, біліммен сусындадым. Елге белгілі тұлғаның қасында жүріп, ғылымның қыр-сырын меңгеру – мен үшін үлкен дәреже. Ұстазымның адами болмысына тәнтімін. Бізді тек маман ретінде ғана емес, тұлға ретінде қалыптасуымызға да өзінің үлкен үлесін тигізді. Күләш Құнантайқызы салған ізбен мен де бүгін шәкірт тәрбиелеудемін. Күләш Құнантаева – менің ғылымдағы анам. Жеткен жетістіктерім ұстазымның еңбегінің жемісі деп білемін. Еңбегін елеп, есімін ұлықтап жатқан Университет басшылығына айтар алғысым шексіз», – деді педагогика ғылымдарының докторы, Л. Н. Гумилев атындағы Еуразия ұлттық университеті профессоры Сейітқазы Перизат Байтешқызы.
Сондай-ақ іс-шара барысында Қазақстан Республикасының Ұлттық ғылым академиясының және ҚР Педагогика ғылым академиясының құрметті академигінің жетістіктері, фотосуреттері, құжаттары мен ғылыми жұмыстары ұсынылатын көрме ұйымдастырылды. Университет ректоры Гүлмира Қанай Күләш Құнантайқызының қазақ әйелдерінің жоғары білім алуы жолында сіңірген еңбегі зор екенін атап өтті.
«Күләш Құнантайқызының қазақ әйелдерінің жоғары білім алуы жолында сіңірген еңбегі зор. Ол кісінің тікелей ықпалымен әйелдер білімінің дамуы және Қазақстанда білім беруді дамыту туралы 400-ден аса ғылыми еңбегі жарық көрді. Оның ішіндегі оқу құралдары мен оқулықтар және монографиялар бар. Күләш Құнантаеваның жетекшілігімен ғылым кандидаттары мен докторлар дайындалды. Қазіргі күнде де «Құнантаеваның ғылыми мектебі» сабақтастығы сақталған», – деді ректор.
Шара соңында үлгерімі үздік және қоғамдық белсенділігімен ерекшеленген Қазақ ұлттық қыздар педагогикалық университетінің 4 студентіне 3 миллион теңге көлемінде ұлағатты ұстаз Күләш Құнантаева атындағы білім гранты салтанатты түрде табысталды. Әлеуметтік жауапкершілік аясында «Almaty Clinic» орталығы студенттерге QyzPU-дың 80 жылдық мерейтойына орай демеушілік көмек көрсетті.
Грант иегері атанған «Шет тілі: екі шет тілі» мамандығының 3 курс студенті Айнұр Бегалиева өзінің қуанышымен бөлісті.
«Мен бүгін Күләш Құнантайқызы атындағы грантқа ие болдым. Қуанышымда шек жоқ. Бұл – менің білімге деген талпынысымды арттыра түсті. Алдағы уақытта бұдан да жақсы оқуға тырысамын. Осындай мүмкіндік сыйлағандарыңызға алғысым шексіз!», – деді студент.
Comments