Алма Қажымұратқызы Тұржанова – «Astana Polytechnic» жоғары колледжі директорының оқу-әдістемелік бірлестігі жөніндегі орынбасары.
1975 жылы Алматы энергетикалық институтын бітіріп, жобалау институтында мамандығы бойынша жұмыс істеді, екі жылдан кейін Көкшетау машина жасау техникумына арнайы пәндер оқытушысы ретінде шақырылды. 1990 жылы Целиноград машина жасау техникумына ауысып, онда оқытушы және бөлім меңгерушісі болып жұмыс істеді. 1994 жылы машина жасау техникумы мен көлік құрылысы техникумы біріккенен кейін директордың оқу ісі жөніндегі орынбасары болды, содан бері колледж студенттері мен педагогтерінің игілігі үшін үздіксіз еңбек етіп келеді.
Тынымсыз еңбек елеусіз қалмады. А.К. Тұржанова – мемлекеттік марапаттардың: Ы. Алтынсарин атындағы медальдың, «Еңбек ері» медалының, «ҚР білім беру ісінің құрметті қызметкері», «Білім беру ісінің үздігі», «ТжКБ үздігі» төсбелгілерінің және т.б. иегері.
Өз мақаласында Алма Қажымұратқызы ұзақ жылдар бойы жемісті жұмыс істеген колледж туралы жылы лебізін білдіреді.
...Колледж – бұл тек тарих емес,
Ал 30 жыл жай сөз емес,
Ондағы өмір баға жетпес сәттер,
Ондағы тағдыр сенікі және менікі...
26 сәуірде «Astana Polytechnic» жоғары колледжінің 30 жылдығына арналған мерекелік іс-шаралар өтеді. Бұл мерейтойды ұжым күш-қуатқа толы көңіл күймен, шығармашылыққа, еңбек етуге деген ұмтылыспен қарсы алады.
Мерейтой – бұл тек тарихи кезең ғана емес. Бұл өткенге көз жүгіртіп, жүріп өткен жолыңа баға беруге, ақылға қонымды, ізгі, мәңгілік іс қалдыруға елеулі үлес қосқандарды жылы сөзбен еске алуға мүмкіндік беретін белес.
Тарих – ең ұлы құндылық. Колледждің негізі қаланған кезде басы-қасында болғандықтан, оның тарихы әлі күнге дейін есімде. Өзінің бар күш-қуатын, ақыл-ойын, тәжірибесін, махаббатын туған колледжіне бергендердің аты-жөнін атап өткім келеді. Бұл бірінші директор В.И. Старунов, К.С. Сеңғазыев (қазір Астана қаласы Білім басқармасының басшысы), қазіргі уақытта Б.К. Рысқалиев сияқты директорлар, директордың орынбасарлары А.В. Сухоцкий, Ж.Т. Жүсіпова, Л.Н. Канажевская, оқу бөлімінің меңгерушісі Г.В. Федотова, сырттай оқу бөлімінің меңгерушісі А.Б. Мұқанов және басқалар. Біз олардың колледждің дамуы мен өркендеуі үшін жасаған қажырлы еңбектеріне таңданамыз. Олар колледждің негізін қалап, дәстүрлер орнатты, заманнан қалыспады, колледжді оңтайландырудан бірнеше сынағынан өтті.
Өзімді басшы ретінде қалыптасты деп ойлаймын. Оқу процесін басқарған отыз жылдың ішінде колледж үшін жасаған еңбегім маған өте қымбат. Колледж үнемі жетілдіріліп, ондағы мамандар даярлаудың сапасы көтеріліп, заманауи технологиялар енгізіліп, жаңа мамандықтар ашылды. Әр мамандықты енгізген кезде оны жүрегімнен өткіздім және қателеспедім, қазір олардың барлығы сұранысқа ие.
Сондай-ақ, мен жұмыс жоспарлары, ТжКБ мәселелері талқыланатын колледж директорларының оқу ісі жөніндегі орынбасарларының әдістемелік бірлестігін басқардым. ӨОӘБ деңгейде жүргізілуде, ол республиканың барлық колледждерінің арасында беделді. Әдістемелік бірлестік ІТ-мамандықтар арасында конференциялар, семинарлар, кәсіби шеберлік конкурстарын өткізеді, білім беру бағдарламалары мен оқу құралдарын әзірлеуге және сараптауға қатысады.
«Astana Polytechnic»-те тамаша материалдық-техникалық база, шығармашылық ұйымшыл ұжым бар. Алғашында, үш колледж, қалыптасқан дәстүрлері бар үш ұжым біріктіріліп, сәйкесінше, осы колледж директорларының үш орынбасары қызметке қабылданған кезде өте қиын болды. Олар жасы менен үлкен әрі тәжірибелі мамандар болды Бірақ олар бірігіп, жұмысты ұйымдастыра білді.
Біздің колледждің оқытушылар құрамы өте мұқият жиналды, бір сөзбен айтқанда, әрбір оқытушы әңгімелесуден өтті, ал қазіргі таңда бұл жоғары білікті ұжым. Қазақ тілінде оқытатын топтарды ашу өте қиын болды, дегенмен университет оқытушыларын жұмысқа шақырудың орайы туды, ол оқытушылар мені ұятқа қалдырмады. Олар Г.Ф. Абдраимова, А.Х. Исмайлова, М.Т. Сембина және басқалар.
«Astana Polytechnic»-тің көптеген оқытушыларын Білім министрлігі үлгілік оқу жоспарларын, тест тапсырмалары мен білім беру бағдарламаларын әзірлеу, республика колледждерін аттестаттау үшін жұмысқа тартты. Мен ТжКБ жүйесінде нормативтік құқықтық актілерді әзірлеу жөніндегі жұмыс топтарына бірнеше рет қатыстым, ҚР Мәжілісінің «Білім туралы заңға» өзгерістер енгізу жөніндегі жұмыс тобында екі рет болдым.
Жалпы білім беру пәндерінің оқытушыларын сақтау үшін тоғызыншы сынып негізінде оқушыларды қабылдау жабылған кезде, № 11 орта мектеп базасында нақты мектеп ашылды, осылайша біз мықты педагогтерімізді сақтап қала алдық және бір жылдан кейін бұл негізсіз шешім жойылды.
Колледж әрдайым аттестаттаудан, халықаралық аккредиттеуден, біліктілікті тәуелсіз бағалаудан сәтті өтіп жүр. Барлық қиындықтарды бірге жеңген команда жиналды. Біз оқу жұмысы, тәрбие жұмысы және спорт бойынша үнемі жүлделі орындарға ие болдық. Қалада елорданың барлық маңызды нысандарының ашылуы, карнавалдар сияқты бірде-бір іс-шара «Astana Polytechnic»-тің қатысуынсыз өткен жоқ, тіпті 2000 жылы Мыңжылдықты өткізуге де қатыстық.
Қазір колледж басшылығына жас топ-менеджерлер келді. Қалыптасқан дәстүрді сақтай отырып, олар жаңалық пен жаңа күш-қуат әкелді. Мен оларды менің шәкірттерім деп мақтанышпен айта аламын. Жас, шығармашыл, белсенді оқытушылар колледждің өміріне қатысады, кәсіби өсумен айналысады, санаттарын арттыруға тырысады және өздерінің күш-жігері үшін лайықты жалақы алады.
Бүгінгі таңда мұғалімдер тек білім көзі болып қана қоймай, студенттерді дағдыларды қолдануға және өз беттерінше білімді ізденуге, коммуникативті болуға үйретеді. Менің ойымша, олардың басымдықтары дұрыс. Оларға қолдау көрсетуге тырысамын.
Студенттер, әдеттегідей, оқытушылардан кәсібилікті, мейірімділік пен түсіністікті күтеді. Қазір түлектерге өзекті құзыреттерді меңгеру, командада жұмыс істей білу, коммуникативтік қабілеттер сияқты өте жоғары талаптар қойылатындықтан, оқыту деңгейіне де қойылатын талаптар жоғары болады. Сабақтар заманауи жабдықтарда өткізілуі, интерактивті әдістемелер қолданылуы, практикадан өту заманауи өндірісте ұйымдастырылуы қажет.
Тарих ауқымында отыз жыл – бұл көп уақыт емес, алайда осы уақыт аралығында қаншама ұлы оқиғалар орын алды десеңізші! Колледждің қабырғасынан елге танымал қанша талантты, атақты түлектер шықты! Мен өзімнің ұжымыммен және түлектеріммен мақтанамын.
Ұжымға әрі қарай дамып, алға жылжуды, әрқашан табысқа сенуді, ал студенттерге – өмірде өз орындарын тауып, қымбат маман болуды тілеймін. Баршаңыздың денсаулықтарыңыз мықты, шуақты күндеріңіз көп болсын! Жүректеріңіз махаббат пен мейірімге, жылылыққа толсын!!!
АННОТАЦИЯ
Заместитель директора Высшего колледжа «Astana Polytechnic» по учебной работе Алма Кажмуратовна Туржанова, будучи очевидцем и активным участником его основания, становления и развития, рассказывает о его истории. Коллектив колледжа благодаря сплоченности и компетентности успешно справляется со всеми вызовами времени. Его состав пополняется молодыми кадрами, которые так же заинтересованы в постоянном совершенствовании и актуальности образовательной деятельности колледжа.
Comments