Алматыда 9-11(12) сынып оқушыларына арналған жаратылыстану-математикалық бағыттағы республикалық олимпиаданың үздіктері анықталды

Алматыда жоғары деңгейде ұйымдастырылған математика мен география пәндері бойынша республикалық олимпиада өз мәресіне жетті. Нағыз білім мерекесіне айналған бес күндік олимпиадаға еліміздің әр өңірінен 324 оқушы қатысып, теориялық және практикалық турларда білімдерін сынап, күрделі тапсырмаларды шешті.

Олимпиаданың жеңімпаздарын марапаттау рәсіміне Алматы қаласы білім басқармасының басшысы Сайран Тапенұлы Сайфеденов қатысып, жеңімпаздарды құттықтады.

«Құрметті олимпиадаға қатысушылар, жас достар! Қазан айында бастау алған республикалық олимпиаданың ақтық кезеңі де келіп жетті. Сіздерді жетістіктеріңізбен құттықтаймын. Әрқашан ата-аналарыңыз бен ұстаздарыңыздың сенімін ақтауларыңызға тілектеспін. Сіздер еліміздің болашағысыздар және білімге деген құштарлықтарыңыз еліміздің көркеюіне үлесін тигізетініне сенімдімін», – деді Сайран Тапенұлы.

Математика және география пәндері бойынша 144 оқушы жүлдегер атанып, 71 қола, 43 күміс және 30 алтын медальді сарапқа салды.

«Дарын» республикалық ғылыми-практикалық орталығының директоры Ғаждембек Қуанышұлы Тұрсынов жалпы білім беретін пәндер бойынша республикалық олимпиаданың жаратылыстану-математикалық бағытының қорытындысын жариялады.

«ҚР Оқу-ағарту министрлігінің бұйрығына сәйкес, биылғы жылы жалпы білім беретін пәндер бойынша республикалық олимпиада жеті өңірде өткізіліп жатыр. Еліміздің үш өңірінде (Ақтау, Астана, Алматы) ұйымдастырылған олимпиаданың жаратылыстану-математикалық бағытына 954 оқушы қатысып, 426-ы жүлдегер атанды. Бүгін біз осы бағыттың үздіктерін анықтаймыз», – деді Ғаждембек Қуанышұлы.

«Үздік ауыл оқушысы» атағын Маңғыстау облысының оқушысы Абылан Дүйсенбек жеңіп алды.

«Мен ауыл оқушыларына арналған олимпиада жеңімпазы ретінде, республикалық олимпиадаға квотамен қатысып, жүлделі болғаныма қуаныштымын. Бұл олимпиада менің интеллектуалды дамуыма және жарыстардағы тәжірибеме зор мүмкіндік болды. Осы мүмкіндікті сыйлаған Оқу-ағарту министрлігі мен «Дарын» орталығына шексіз алғыс айтамын», – деді Абылан Дүйсенбек.

«Үздік олимпиадалық команда» номинациясы бойынша үшінші орынды Шығыс Қазақстан мен Ақтөбе облыстары, екінші орынды Павлодар облысы командалары иеленді. Бірінші орын Алматы, Астана және «РФММ» КеАҚ командаларына бұйырды. Ал Бас жүлде екінші жыл қатарынан «Назарбаев Зияткерлік мектептері» құрама командасына тиесілі. Олар алты пән бойынша 69 оқушы болып қатысып, 63 жүлде жеңіп алды.

Қола медаль иегерлерін марапаттаған география пәнінен республикалық олимпиаданың қазылар алқасының мүшесі Аида Дүйсенбайқызы Давлетова:

«Мен барлық оқушыларды олимпиадаға қатысуларымен құттықтаймын. Себебі осы кезеңге жету үшін сіздер көп еңбектендіңіздер. Сіздердің қола медальдарыңыз – алтынмен пара-пар. Баршаңызға оқуда да, өмірде де тек жақсы жетістіктер тілеймін!» – деді.

Жаратылыстану-математикалық пәндер бойынша әл-Фараби атындағы Қазақ ұлттық университеті алты грант бөлді.

Осы орайда, олимпиаданың жоғары ғылыми деңгейде өтуіне үлес қосқан педагог-тәлімгерлердің, жаттықтырушылардың және қазылар алқасының, еліміздің жетекші ЖОО қосқан үлесін атап өту қажет. Олардың кәсібилігі мен қажырлы еңбегі оқушылардың жоғары деңгейде дайындалып, сапалы да табысты олимпиада көрсетуіне ықпал етті.

Сондай-ақ, жалпы білім беретін пәндер бойынша республикалық олимпиада жалғасын табатынын естеріңізге сала кетейік. 31 наурызда қоғамдық-гуманитарлық бағыттағы сайыс Оралда басталып, бес күнге созылады. Оған 173 оқушы қатысады.