4 наурыз күні Әзербайжан астанасында ҚР Ғылым және жоғары білім министрлігі ұйымдастырған ҚР Әзербайжандағы Елшілігінің қолдауымен және еліміздің 20-дан астам жетекші университетінің қатысуымен «Study in Kazakhstan» көрмесі басталды. 4-5 наурыз аралығында өтетін бұл іс-шара Әзербайжанның талапкерлері мен студенттеріне Қазақстан университеттеріндегі академиялық бағдарламалармен, ғылыми бағыттармен және білім алу шарттарымен танысу мүмкіндігін ұсынады, «Замануи білім беру» журналы Оқу-ағарту министрлігінің баспасөз қызметіне сілтеме жасай отырып хабарлайды.
Көрме Әзербайжан жастарының Қазақстандағы жоғары және жоғары оқу орнынан кейінгі білім алу мүмкіндіктеріне деген қызығушылығын көрсетеді. Экспозицияның алғашқы сағаттарында оны 1000-нан астам талапкер мен олардың ата-аналары аралап шықты, олар Қазақстан университеттеріндегі бакалавриат, магистратура және докторантура бағдарламаларына қызығушылық танытты.
ҚР Ғылым және жоғары білім министрі Саясат Нұрбек ашылу салтанатында сөз сөйлеп, жоғары білім саласындағы ынтымақтастықты дамыту Қазақстан мен Әзербайжан арасындағы стратегиялық серіктестіктің маңызды бағыттарының бірі екенін атап өтті. Оның айтуынша, екі ел арасындағы білім беру байланыстары бірлескен ғылыми бастамалар мен академиялық алмасулар негізінде нығайып келеді.
Министр сондай-ақ екіжақты ынтымақтастық аясында Әзербайжан азаматтарына Қазақстанда және қазақстандық студенттерге Әзербайжанда оқу үшін жыл сайын эквивалентті негізде 12 стипендия бөлінетінін айтты. Сонымен қатар бөлінетін стипендиялар саны студенттердің екі елде білім алу мүмкіндіктерін кеңейту мақсатында арттырылатын болады. Қазіргі уақытта Қазақстан жоғары оқу орындарында 222 Әзербайжан студенті білім алуда, ал Әзербайжанда шамамен 80 Қазақстан студенті оқуда.
Саясат Нұрбек Қазақстанның әлемдік білім беру стандарттарын енгізуді жалғастырып жатқанын және оған елімізде жетекші америкалық, британдық, корейлік және еуропалық университеттердің стратегиялық серіктестері болуы ықпал ететінін атап өтті. Бұл инновациялық оқыту әдістемелерін енгізуге, халықаралық зерттеу жобаларын құруға және студенттерге әлемдік деңгейдегі білім беру бағдарламаларына қолжетімділік ұсынуға мүмкіндік береді.
Сонымен қатар Қазақстан мен Әзербайжан академиялық мобильділік, ғылыми зерттеулер және жарияланымдар саласындағы ынтымақтастықты кеңейтуді жоспарлап отыр. Осыған орай, бірлескен зерттеу жобаларын ортақ зертхана базасында іске қосу, гранттық зерттеулер бағдарламасын құру және екі ел ғалымдарының ғылыми жұмыстарын беделді академиялық басылымдарда жариялау мүмкіндіктерін кеңейту жоспарлануда.
ҚР Әзербайжандағы Төтенше және Өкілетті Елшісі Әлім Байел бұл іс-шараның маңыздылығын атап өтіп, оның білім беру саласындағы ынтымақтастық үшін берік негіз қалап жатқанын айтты.
Әзербайжан Республикасының Ғылым және білім министрі Эмин Амруллаев бұл ауқымды көрменің Әзербайжан жастары үшін жаңа білім беру мүмкіндіктерін ашады деген сенімін білдірді.
Commentaires