25.07.2024
Техникалық және кәсіптік білім беру ұйымдарына құжат қабылдау жалғасуда. Енді абитуриенттер колледжге түсу үшін құжаттарын eGov порталы арқылы тапсыра алады, деп хабарлайды ҚР Оқу-ағарту министрлігінің баспасөз қызметі, «Замануи білім беру» журналы Оқу-ағарту министрлігінің баспасөз қызметіне сілтеме жасай отырып хабарлайды.
![Документы для поступления в колледж можно подать на портале eGov](https://static.wixstatic.com/media/f48cb8_dd81f39e7bc2433487d08446acfc1199~mv2.jpeg/v1/fill/w_713,h_361,al_c,q_80,enc_auto/f48cb8_dd81f39e7bc2433487d08446acfc1199~mv2.jpeg)
Құжат тапсыру кезінде порталды қолданушы оқу тілін жән өңірді таңдай алады. Порталда автоматты түрде абитуриенттің білімі, бағалары және оның сертификатының жалпы бағасы туралы ақпарат шығарылады. Азаматтардың жеңілдігі бар жекелеген санаттары үшін (І және ІІ топтағы мүгедектігі бар адамдар, жетім балалар, ата-анасының қарауынсыз қалған балалар, т. б.) жүйе оның мәртебесі туралы қосымша ақпаратты көрсетеді.
Сонымен қатар өтінімнің мәртебесін бақылап отыру және қажет болған жағдайда оны кері қайтарып алу мүмкіндігі қарастырылған. Атап өту керек, бір абитуриент 4 колледжде 4 түрлі мамандықты таңдай отырып бір ғана өтінім бере алады.
Абитуриент өтінімді беру үшін eGov порталына кіріп, «Білім» бөліміндегі «Колледждер» санатын таңдауы тиіс. Мұндағы көрсетілген барлық кестені толтырып, файлды жүктейді және ЭЦҚ арқылы қол қояды.
Атап өту керек, колледждерге құжаттар қабылдау 25 тамызға дейін жалғасады. Бүгінгі таңда 96 мыңнан астам өтінім қабылданды. Жаңа оқу жылында тегін техникалық және кәсіби білім берумен 145 мың студент қамтылады деп жоспарлануда.
Оқу-ағарту министрлігі Цифрлық даму, инновация және аэроғарыш өнеркәсібі министрлігімен, «ҰАТ» АҚ-мен және А. Байтұрсынұлы атындағы «Талдау» ҰЗББО бірлесіп аталған қызметті автоматтандырып, іске қосты.
Comments