15.07.2024.
Д. Серікбаев атындағы ШҚТУ оқытушылар делегациясы «Лу Бань шеберханасы» жобасының екінші кезеңі шеңберінде оқудан өту үшін Тяньцзинь қаласына (Қытай) келді, «Замануи білім беру» журналы Ғылым және жоғары білім министрлігінің баспасөз қызметіне сілтеме жасай отырып хабарлайды.
Тағылымдама Тяньцзинь кәсіби институтының (TVI) базасында екі апта бойы өтеді. Биылғы жылы ШҚТУ делегациясының құрамы 30%-ға жаңарды және университеттің магистранттары мен докторанттарын қамтыды.
Сапардың бірінші күні ашылу салтанатынан басталды, онда TVI Президенті Wu Zongbao, ШҚТУ академиялық мәселелер жөніндегі проректоры Машекенова Асия Хасенқызы, Халықаралық инженерия мектебінің профессоры Мұздыбаев Мұрат Сейітұлы, сонымен қатар, TVI автомобиль инженериясы институтының өкілдері сөз сөйледі.
Тағылымдама бағдарламасы ақпаратқа толы және автомобиль көлігі мен зияткерлік көлік жүйелері саласында заманауи Қытай жабдықтарын қолдану бойынша практикалық дағдыларды игеруге бағытталған.
ШҚТУ делегациясы интеллектуалды желілік автомобильдердің жұмысымен, LIDAR жұмыс принципімен және 360 градусқа айналмалы камералармен танысты, сондай-ақ оқытушылар Python бағдарламалау тілінде практикалық жұмыстарды орындауға кірісті.
Сонымен қатар, тағылымдама шеңберінде көлік саласындағы инновациялық технологиялар бойынша дәрістер мен мастер-класстар өткізетін TVI жетекші сарапшыларымен және ғалымдарымен кездесулер жоспарланған. ШҚТУ оқытушылары заманауи зертханалар мен зерттеу орталықтарына баруды көздеп отыр, бұл оларға озық тәжірибені қабылдауға және оны өз университетінің оқу процесіне енгізуге мүмкіндік береді.
Бұның барлығы «Көлік машина жасаудағы Смарт-технологиялар және жасанды интеллект» жаңа инновациялық білім беру бағдарламасын іске асыру үшін қажет. Бұл білім беру бағдарламасы көлік саласы үшін көлік құралдарының қауіпсіздігі мен автопилоттау жүйелеріне біріктірілген. Сондай-ақ, «Internet of Vehicle» смарт-технологиялары көмегімен көлік жүйесінің тиімділігін арттыру функцияларын орындайтын ғылымды қажетсінетін зияткерлік жүйелердің жұмысқа қабілеттілігін қамтамасыз ететін IT-мамандар пәнаралық даярлаудан өтеді.
Бұл білім беру бағдарламасына алғашқы қабылдау 2024 жылдың қыркүйегіне жоспарланған. Оқыту смарт-технологиялар және зияткерлік жүйелер (SMART, ADAS, RADAR, LiDAR технологиялары) бойынша бірегей жабдықтармен жарақтандырылған «Лу Бань шеберханасының» оқу базасында іске асырылатын болады. Сондай-ақ, ШҚТУ-да жаңа SMART Driving Technology орталығын құру жоспарланған. Ол қосымша «Internet of Vehicle» смарт технологияларын жүргізудің, спутниктік навигацияның және үшінші деңгейдегі автопилоттаудың зияткерлік қауіпсіздік жүйелерін іске асыратын жаңа технологиялар мен электромобильдермен жабдықталады.
Бұл сапар «Лу Бань шеберханасы» жобасының маңызды бөлігі болып табылады және ШҚТУ оқытушыларының біліктілігін арттыруға бағытталған. Болашақта Қазақстанның автомобиль саласы үшін автомобиль көлігі және зияткерлік көлік жүйелері саласында жоғары дәрежелі мамандар даярлауға мүмкіндік беретіні сөзсіз.