«Терең білімін озық тәжірибемен ұштастыра білген азаматтар елімізді алға жетелейді»,-деді Мемлекет басшысы Қасым-Жомарт Тоқаев. Бұл туралы Мемлекет басшысы «Қазақстанның 100 жаңа есім» жобасының жеңімпаздарымен кездесуінде сөйлеген сөзінде айтты, деп хабарлайды ҚазАқпарат.
«Қазақ «Жақсының жақсылығын айт нұры тасысын» деп, дара тұлғаларының мерейін асырған. Бүгінгі белес сіздерді жаңа биіктерге бастайды деп сенемін. Шын мәнінде, елімізде өз кәсібінің майталманы атанған жастар аз емес. Ортамызда медицина, білім-ғылым, экология, IT технологиясы және басқа да салалардың өкілдері отыр. Қазіргі күрделі кезеңде бұл мамандықтардың қай-қайсысы да айрықша маңызды. Терең білімін озық тәжірибемен ұштастыра білген азаматтар елімізді алға жетелейді. Осы орайда, тәуелсіздік кезеңінде өсіп жетілген буынның қарым-қабілетін жоғары бағалаймын. Білімді әрі саналы ұрпақ тәрбиелеу – бұл аса маңызды мемлекеттік міндет. Еліміздің болашағы дарынды, отаншыл жастардың қолында болуы керек. Солай боларына кәміл сенемін. Осы стратегиялық мақсатқа қол жеткізу үшін жүйелі реформаларды міндетті түрде жалғастырамыз»,-деді Президент Қасым-Жомарт Тоқаев.
#Қазақстан Президенті #Білім #100 жаңа есім
Comments