Жаңадан шыққан технологиялық гаджеттер «жан мен тәнге» азырақ орын қалдыруда. Күні кеше біз қазіргі кезде кез келген аулада бар заманауи спорт алаңдарының таяқ тастам жерде болғанын армандайтын едік. Бірақ міне, қарама-қайшылық: ол жерлерден балалардың бақытты дауысы күн өткен сайын сирек естіліп келеді. Баланы компьютер ойынынан немесе телефоннан ажырату мүмкін болмай бара жатыр. Бүгінгі таңда баланы тәрбиелеудің тиімді үлгісін табанды іздестіру барысында біз спорт пен дене шынықтырудың дені сау және жігерлі тұлғаны қалыптастырудың дәлелденген әдісі болғанын және болып қала беретінін көбіне ұмытып кетеміз. Бірақ біздің елімізде балалар мен жасөспірімдер спортына үнемі басымдық беріледі. Мемлекет басшысы барлық балалар үшін спорттың барынша қолжетімділігін қамтамасыз етуге, спорт секцияларын ашуға, спорт инфрақұрылымын құруға баса назар аудару керектігін үнемі айтады.
Балалар мен жасөспірімдер спортын дамытуға спортшылардың өздері, қоғам қайраткерлері де қызығушылық танытады, олар коммерциялық емес ұйымдарға бірігіп, өздерінің алдында тұрған міндеттерді бірлесіп шешеді. Осындай бірлестіктердің бірі – Қазақстанның жекпе-жек өнері қауымдастығы (ҚЖӨҚ). Каратэ, таэквондо және басқа да жекпе-жек өнері секциялары балалар мен жастардың арасында әрқашан ерекше танымал болды. Осы секциялардың бүгінгі күні жағдайының қалай екенін, Қазақстанның жекпе-жек өнері қауымдастығының қызметі және балалар мен жасөспірімдер спортының балаларды тәрбиелеу барысында атқаратын рөлі туралы білу үшін біз ҚЖӨҚ вице-президенті-бас директоры Абай БАТЫРОВТЫ әңгімеге тарттық.
– Абай, сіз 45 жастасыз. «Қорықпа, мен сенімен біргемін!» фильмінде Сан Саныч өзі тамаша меңгерген каратэ жекпе-жек өнерінің адамгершілік қағидаларын экраннан насихаттағаны сіз бен біздің замандастарымыздың әлі күнге дейін есінде шығар. Сіздің ойыңызша, біздің қоғамда жекпе-жек өнерінің осы тәрбиелік миссиясы қаншалықты өзекті және сұранысқа ие?
– Иә, сіз дұрыс айтасыз, бұл фильм менің есімде. Айтпақшы, оның сол кездегі бүкіл посткеңестік кеңістікте жекпе-жек өнерімен айналысуға түртікі болған ынталандырушы рөлін атап өткім келеді. Бүгінгі таңда жастарымызды ынталандыратын осындай дүниелердің көбірек болғанын қалаймын. Өйткені, жекпе-жек өнері шын мәнінде, жай ғана спорт түрі емес, ол спортшының тәнін ғана емес, рухын да шыңдайтын ғасырлар бойы қалыптасқан философия.
Балаларға жекпе-жек өнерімен айналысу үлкен пайда әкеледі. Жекпе-жек өнері иммунитетті нығайтуды, дененің сырт-келбетінің, күштің, төзімділіктің, реакцияның дамуын қамтамасыз етеді, мінездің шынығуына ықпал етеді, тәртіпке, мақсатқа талпынушылыққа, төзімділікке, байсалдылыққа үйретеді. Сонымен қатар, олар түйсік пен зейінді дамытады. Жекпе-жек өнерімен тұрақты айналысу психофизикалық және жеке қасиеттердің қалыптасуына оң әсер етеді, күйзелісті, агрессиялықты басады.
Жекпе-жек өнерімен айналысудың пайдасы тек мінезді тәрбиелеумен және физикалық дамумен ғана шектеліп қоймайды, сонымен қатар адамдың бойына терең философиялық білім мен құндылықтарды құяды.
Спорт сарапшыларының зерттеулеріне сәйкес, шығыс жекпе-жек өнерімен айналысатын балалар спортқа қызығушылығы жоқ балалармен салыстырғанда оқуда және әлеуметтік бейімделуде ең үздік нәтиже көрсетеді.
Менің ойымша, спорт – үйлесімді тұлғаны тәрбиелеудің ажырамас бөлігі. Отансүйгіштік, жеңіске деген құштарлық сияқты қасиеттер спорт арқылы, әсіресе күш беретін, жігерлендіретін жекпе-жек өнері арқылы бойға жақсы сіңіріледі.
– Белгілі бір балаға жекпе-жек өнерінің қай түрінің қолайлы екенін қалай білуге болады? Жекпе-жек өнері түрлерінің ерекшеліктері қандай? Әрине, спорттың өзіңізге ұнайтын кез келген түрін таңдауыңызға болады, бірақ кейбірінің дене бітімі мен мінезі джиу-джитсуға, ал кейбірінікі каратэге ыңғайлы болып келуі мүмкін.
– Балаларға арналған жекпе-жек өнерін шартты түрде шығыс және спорттық жекпе-жек деп бөлуге болады. Спорттық жекпе-жекке унибой, муайтай, қолданбалы жекпе-жек, самбо және ушу-ның кейбір түрлері сияқты спорттың соғатын және күресетін түрлері жатады. Шығыс жекпе-жегіне – айкидо, таэквондо, каратэ, джиу-джитсу, кунг-фу, кикбоксинг және басқалары жатады. Мен атап өткен жекпе-жек өнерінің кейбір түрлері туралы қысқаша түсінік берейік.
Айкидо. Айкидоның негізгі тұжырымдамасы – қарсыластың өз энергиясын өзіне қарсы бағыттау арқылы жеңу. Айкидомен айналысу абстрактілі ойлауды дамытады, өз денеңді сезінуге, орын алған жағдайға талдау жасауға үйретеді. Балалар 4 жастан бастап қабылданады.
Таэквондо. Көптеген соққылардың, блоктардың, секірудің өте көп түрімен сипатталатын белсенді ұрыс жүйесі. Бұл секцияларға белсенді және күшті балаларды берген дұрыс. Спорттың осы түрімен айналысқан кезде бұлшықеттер дамиды, үйлестіру, созылу бойынша жұмыс істейді.
Ушу. Соққылардың, қолды айқастыра ұстаудың көптігіне қарамастан, ең қауіпсіз спорт түрлерінің бірі. Спорттың бұл түрі шығыс жекпе-жек өнерінің түрлі элементтерін біріктірді. Жекпе-жектің бұл түрі кез келген қақтығыстардан аулақ болуға, физикалық және рухани жетілу арқылы үйлесімділікке ұмтылуға үйретеді.
Каратэ. Қолмен және аяқпен өте көп соққылар жасайтын спорттың қаталдау түрі. Мектеп жасына дейінгі балалар үшін ең жақсы таңдау – жарақат алу қаупі аз жанаспайтын каратэ. Спорттың бұл түрі реакцияны, төзімділікті және ептілікті дамытады.
Джиу-джитсу. Ұрыстың жүйесі өте агрессивті, әртүрлі соғу, тұншықтыру және ауырту әдістерін қамтиды. Балаларға джиу-джитсудың жанаспайтын түрімен айналысуға кеңес беріледі.
Спорт және қолданбалы жекпе-жек. Самбо. Спорттың бұл түрі қаруды қолданбай өзін-өзі қорғауға үйретеді. Жаттығу барысында басты назар төзімділікті арттыруға және ауырту әдістерін үйретуге аударылады. Спорттың басқа түрлерінен айырмашылығы, мұнда тұншықтыру әдістерін жасауға тыйым салынады.
Кикбоксинг – қолмен және аяқпен соғуға рұқсат беретін жекпе-жек өнерінің бір түрі. Жабдықта міндетті түрде бокс қолғаптары болуы керек. Бастапқыда кикбоксинг ережелері бәріне: кез келген соққылар жасауға, қолмен байлап ұстау, қағу, лақтыру, аяқтан шалу әдістерін жасауға мүмкіндік берді.
Шығыс жекпе-жегінде айқын агрессияға, ырықсыздыққа орын жоқ, тіпті каратэ немесе джиу-джитсу сияқты спорттың қатал түрлері де спортшыларды өзін-өзі ұстауға, төзімділікке және даналыққа үйретеді.
Көріп отырғанымыздай, жекпе-жек өнерінің түрі көп және сіз бұл спорттың қай түрі бала үшін ең қызықты екеніне және оның физикалық мүмкіндіктерін жүзеге асыруға ықпал ететініне назар аударуыңыз керек.
Жекпе-жек өнерінің барлық түрі баланы нағыз көшбасшы етіп тәрбиелей алады, сабақтарда моральдық-этикалық тәрбиеге, өзіне деген сенімділік пен құрметті арттыруға үлкен көңіл бөлінеді.
– Қане, сіздің қауымдастығыңыз туралы әңгіме қозғайық. Оны тіркеген кезде қандай мақсаттар қойылды?
– Қазақстанның жекпе-жек өнері қауымдастығы (ҚЖӨҚ) бес жыл бұрын, 2018 жылы құрылды. Қауымдастықтың басты мақсаты – елімізде жекпе-жек өнерін дамыту, өскелең ұрпақты бұқаралық спорт түрлеріне тарту, сондай-ақ халықаралық спорт аренасында қазақстандық спорттың имиджін көтеру. Бастапқыда, тіркеу кезеңінде Қауымдастықтың құрамында бірнеше спорт федерациясы болды, кейіннен басқа ұйымдар қосылды.
– Қауымдастық еліміздің қай аймақтарын қамтиды? Өңірлерде жұмыс қалай жолға қойылған?
– ҚЖӨҚ бүкіл Қазақстан бойынша өкілдік етеді: 17 аймақтық кеңсе ашылды және жаңа әкімшілік-аумақтық облыстарда, атап айтқанда Семей, Талдықорған, Жезқазған қалаларында, оның ішінде жасөспірімдер, балалар мен жастар арасында жекпе-жек түрлерін дамыту және Қазақстанның барлық облыстарында салауатты өмір салтын насихаттау мақсатында ҚЖӨҚ-тің өңірлік кеңселерін ашу жұмыстары жүргізілуде.
Бүгінгі таңда Жекпе-жек өнері қауымдастығының қанатының астында 87 000-нан астам жас спортшы спорт секцияларында спортпен айналысады
және ішінара демографиялық жағдайды жақсарту, ішінара жастармен тұрақты ақпараттық жұмыс жасау, қаржыландыруды арттыру және осы спорт түрлерін дамыту арқылы қамтудың үнемі ұлғаюы байқалады.
Біздің әрбір филиалымыз өз өңіріндегі Қауымдастықтың барлық қатысушыларының белсенді бірлескен жұмысын жолға қоюға ұмтылады, осы немесе өзге спорттық іс-шараны өткізуге байланысты ұйымдастырушылық мәселелерді бірлесіп шешеді, қаржы іздеумен айналысады, Қауымдастық мүшелерінен спорттың сол немесе басқа бір түрінің, спорт объектісінің жағдайын жақсарту жөнінде ұсыныстар қабылдайды. Әрі қарай біз ұсыныстарды талдаймыз, талқылаймыз және қажет болған жағдайда Туризм және спорт министрлігіне бастамалармен шығамыз. Мысалы, Қазақстан Республикасы Мәдениет және спорт министрінің бұйрығымен Республикалық кешенді спорттық-бұқаралық іс-шаралар тізбесіне біздің Қауымдастықтың және дене шынықтыру және спорт саласындағы уәкілетті органның қамқорлығымен өткізілетін турнирді – Жекпе-жек өнері фестивалін өткізу енгізілді.
– Қауымдастықта қандай спорт түрлері бар?
– Таэквондо, унибой, муайтай, ушу және кунг-фу, кикбоксинг, қоян-қолтық төбелес федерациялары және басқалары толық жанасатын спорт түрлерін ұсынады. Самбо, джиу-джитсу, грэпплинг, белбеу күресі және т.б. жекпе-жек федерациясы ұсынады. Карате-до кёкушинкай, киокушинкай-кан карате, кёкушинкай карате, карате-до шотокан, шинкиокушинкай, ашихара карате федерациясы каратэ сияқты спорт түрін кеңінен ұсынады.
– Қауымдастықтың құрамына жекпе-жек шеберлерін дайындайтын қанша спорт федерациялары кіреді?
– Ұйымның құрамына олимпиадалық емес спорт түрлерінен 27 федерация кірді. Қазіргі уақытта тағы 15 республикалық спорт федерациясының кіруіне дайындық жүріп жатыр. Осылайша, 2023 жылдың аяғында, Қауымдастықтың бес жылдығына орай оның құрамында 40-тан астам спорт федерациясы болады.
– ҚЖӨҚ-ке кіру жекпе-жек өнері федерацияларына не береді?
– Қазақстанның жекпе-жек өнері қауымдастығы белсенді жұмыс істейді және өз мүшелеріне қолдау көрсетеді, Қазақстан чемпионаттары, сондай-ақ ірі Азия және әлемдік турнирлер сияқты ірі республикалық және халықаралық турнирлерді ұйымдастыруға белсене қатысады және көмек көрсетеді.
Егер сіз динамиканы бақылайтын болсаңыз, Қауымдастық мүшелерінің жүлделі орындар көрсеткіштерінің артқанын байқауға болады. Әрине, бұл тікелей біздің еңбегіміз деп айта алмаймын, бірақ Қауымдастық жұмысы бірлестіктің барлық қатысушыларының жұмысына жалпы пайдалы әсер ететініне сенімдімін. Мысалы,
2023 жылдың бірінші жартыжылдығында Қазақстанның жекпе-жек өнері қауымдастығына мүше спортшылар әлем чемпионаттарында 104 алтын, 116 күміс, 230 қола медальды жеңіп алды.
Қауымдастық мүшелері көрсететін қызметтердің кәсібилігі мен сапасын одан әрі арттыру үшін қазіргі уақытта нұсқаушылар мен жаттықтырушылар үшін кәсіби аттестаттау тетігі пысықталуда. Бұл секциялар мен клубтардың, сондай-ақ онда оқитын балаларға арналған белбеулер мен сертификаттардың беделін арттырады.
– Бүгінгі таңда біздің елімізде жекпе-жектің қандай түрлері белсенді дамып келеді? Біздің спортшылардың ең көп жүлделі орындары қандай?
– Қазақстанда жекпе-жектің барлық түрі қарқынды дамып келеді, олардың ішінен біреуін бөліп көрсету қиын. Осыған қарамастан,
ағымдағы жылдың 22-28 тамызы аралығында Қытайда өткен тоғызыншы әлем чемпионатында керемет нәтиже көрсеткен біздің спортшылардың 6 алтын, 10 күміс және 11 қола медальді жеңіп алуы
қазақстандық ушу, атап айтқанда «Қазақстандық ушу және кунг-фу федерациясы» РҚБ үшін керемет тарихи оқиға болғанын атап өтуге болады.
UWW грэпплингтен Қазақстан Республикасының жастар құрамасы ағымдағы жылдың 21-23 тамызында Польшада өткен әлем чемпионатында 1-ші жалпыкомандалық орынға ие болып, турнирден 18 алтын, 8 күміс және 2 қола медаль алып кетті. Сонымен қатар, жыл сайын джиу-джитсудан Қазақстан құрамасы чемпиондық және жүлделі орындарға ие болады және әрқашан жеңіп алған медальдар бойынша үздік 5 елдің қатарына кіреді. Біздің басқа спортшылар – самбистер, каратэшілер, таэквондистер, тай бокс (муайтай) спортшылары біздің федерацияларымыз ұсынатын әр түрлі жас санаттарындағы түрлі турнирлер мен жарыстарда табысты өнер көрсетіп жүр.
– Даму ерекшеліктері бар балалар жекпе-жек өнерімен айналыса ала ма?
– Біздің Қауымдастық «Жас Жауынгер» балалар дене шынықтыру-сауықтыру клубына тұрақты қолдау көрсетеді. Бұл клубтың мақсатты аудиториясы – ерекше қажеттіліктері бар: церебральды сал ауруы, Дауна синдромы, тірек-қимыл аппаратының бұзылуы және басқа да ерекшеліктер бар балалар. Клубта 5 жастан 18 жасқа дейінгі балалар спортпен айналысады. «Жас Жауынгер» дене шынықтыру-сауықтыру клубына 50-60-қа жуық бала келеді. Клубтың негізгі мақсаты – мүмкіндігі шектеулі балаларды қоғамда өмір сүруге бейімдеу, бейімделгіш спорт арқылы олардың өмір сүру сапасын жақсарту, өзін-өзі қалыптастыруға қол жеткізу, психоэмоционалды фонды жақсарту және ең маңызды аспект – отыруға, еңбектеуге, тұруға, жүруге, тепе-теңдікті сақтауға, қозғалыстарды үйлестіруді дамытуға үйрету арқылы қимыл-қозғалысты жақсартуға қол жеткізу. Олар жастайынан Паралимпиада ойындарына дайындалады. Жаттығу процесі бала спортқа емес, кез келген спорт түрі балаға бейімделетін бейімделген жекпе-жек өнері бойынша өтеді.
Жекпе-жек өнері өте танымал, өйткені жас кезінен бастап балалар өздерін, әлсіздерді қорғай білуі керек, сол сияқты ерекше балалар да дені сау балалар сияқты осы дағдыларды үйренуі керек.
«Жас Жауынгер» клубының қабырғасында бала өз арманын жүзеге асыра алады. Балалар клубта бес жыл бойы спортпен тегін айналысады. Спорт кешеніндегі зал Қазақстанның жекпе-жек өнері қауымдастығының қолдауымен тегін берілген. Балалармен жоғары білікті мамандар: жоғары дене шынықтыру білімі, орта медициналық білімі бар, ерекше балалармен кемінде үш жыл жұмыс тәжірибесі бар емдік-дене шынықтыру нұсқаушылары жұмыс істейді. Өткен жылы Қазақстанның жекпе-жек өнері қауымдастығы «Балқаш» емдеу-сауықтыру кешенімен бірлесіп ерекше қажеттіліктері бар 40 балаға арналған санаторий-курорттық ем ұйымдастырды.
– Жекпе-жек өнерінің сол немесе басқа секциясы сіздің Қауымдастыққа кіретінін қалай білуге болады? Мүмкін Интернетте тізім бар шығар?
– Ия, әрине, біздің www.jayynger.kz сайтында және әлеуметтік желілерде Қауымдастыққа кіретін барлық спорт федерацияларының тізімін табуға болады. Сондай-ақ, әр федерацияда Қауымдастық мүшесінің сертификаты бар, оны жаттықтырушылардан немесе секция басшысынан сұрауға болады.
– Қазақстанның жекпе-жек өнері қауымдастығын кім қаржыландырады?
– Қауымдастық өз қызметін демеушілік қолдаудың арқасында ғана жүзеге асырады, біз мемлекеттік қаржыландыруды алмаймыз. Біз бірнеше жылдан бері ынтымақтастықта бірлесіп жұмыс істеп келе жатқан «SPORTQORY Туризм және спорт саласын қолдау қоры» корпоративтік қоры мен «Сəтті Жұлдыз» АҚ – Қазақстанның Ұлттық лотереясы атынан демеушілеріміз бен серіктестерімізге алғысымызды білдіреміз. Осылайша, «SPORTQORY» қорымен бірлесе отырып, Қауымдастықтың тапсырысы бойынша «Жауынгер» деректі фильмі түсірілді. Фильм спортшы Галина Дуванова туралы баяндайды. Бұл – Отанына деген сүйіспеншілігі, інісіне деген жауапкершілігі мен қамқорлығы оны Қазақстанға қайтарған, джиу-джитсудан қара белбеу иегері, Азияның үш дүркін чемпионы және Еуропа чемпионы атанған жетім қыз туралы өте шабыттандыратын фильм. Спорт оның жеке тұлғалық өзгеруіне керемет түрткі болды, барлық қиындықтарды жеңіп, спорттық тұғырға көтерілуіне ғана емес, сонымен қатар мансабының өсуіне де мүмкіндік берді.
Барлық түскен қаражат ашық түрде бөлінеді, әдетте олар демеушілер тарапынан нақты мәселелерді шешуге және белгілі бір спорттық жобаларды жүзеге асыруға жіберіледі. Жұмыстың нәтижелері үнемі көрініп тұрады, ал қаражаттың ұтымды және мақсатты пайдаланылуын барлық қажетті есептерді ұсынатын Қауымдастықтың ішкі бақылау-қаржы органы қадағалайды. Жалпы алғанда, біздің командада тиімді жоспарлау мен басқаруды қамтамасыз ететін өте білікті және тәжірибелі мамандар жұмыс істейді.
– Қауымдастықтың әлемдік қоғамдастықпен байланысы бар ма?
– ҚЖӨҚ Халықаралық спорт федерацияларының дүниежүзілік бірлестігімен (GAISF) және Жекпе-жек өнері шеберлерінің дүниежүзілік комитетімен (WMC) халықаралық ынтымақтастықты белсенді дамытуда. Осылайша, GAISF-тің қамқорлығымен 2021 жылы Астана қаласында Дүниежүзілік жекпе-жек өнері ойындарын өткізу жоспарланған болатын, алайда COVID-19-ға байланысты эпидемиологиялық жағдайдың салдарынан іс-шара өткізілмей қалды.
Биыл Дүниежүзілік жекпе-жек ойындары (World Combat Games) Сауд Арабиясы Корольдігінің астанасы – Эр-Риядта өтеді. Онда жекпе-жек өнерінің 15 түрі қойылып, GAISF-ке мүшелікке кіретін 80 елден 2500 мыңнан астам спортшы қатысады. Ойындар 2023 жылдың 20-30 қазаны аралығында өтеді. WCG – бұл әлемдегі ең жақсы спортшыларды көрсететін және осы спорт түрлерінен жер жаһанға танымал ететін спорттың жекпе-жек өнері түрлерінің керемет мерекесі. Біздің ҚЖӨҚ делегациясы осы әлемдік фестивальге қатысуды жоспарлап отыр.
– Қауымдастық оқу орындарымен, жоғары оқу орындарымен өзара іс-қимыл жасай ма?
– Иә, білім беру саласындағы белсенді жұмыс – қауымдастық қызметінің бағыттарының бірі. ҚЖӨҚ бастамасы бойынша ҚР-да спорттық құқық туралы оқу құралын шығаруға дайындық жүріп жатыр. Сонымен қатар, ағымдағы жылдың соңына дейін Қауымдастық Қазақстанның жекпе-жек өнерінің даму тарихы туралы энциклопедияны шығаруды дайындауда.
Спорттық медицина, спорттық психология, спорттық құқық, спорттық жаттығу теориясы мен практикасы бойынша жоғары білікті мамандармен бірлесе отырып, Қауымдастық құрамына кіретін 27 федерацияның жаттықтырушылары үшін
әртүрлі спорттық біліктіліктегі спортшылардың оқу-жаттығу процесін құру негіздері, жоғары дәрежелі спортшыларды даярлау, жауапты жарыстарға оқу-жаттығу жиындарын өткізу бойынша ай сайынғы біліктілікті арттыру курстары өткізіледі. Қауымдастық пен «Спортшылардың допингке қарсы зертханасы» РМҚК допингке қарсы бағдарлама бойынша үнемі дәрістер өткізеді. Республикалық оқу-әдістемелік талдау орталығымен бірлесіп республикалық үлгідегі сертификаттар бере отырып, жаттықтырушылардың біліктілігін арттыруға арналған республикалық курстарды өткіземіз ниетіміз бар.
Қауымдастық мүшелері жоғары оқу орындарында, колледждерде секциялар жүргізіп, мектептерде секциялар ашады. Әсіресе, қазір ауылдық жерлерде секциялардың көбейіп, сол арқылы ауыл жастарының өзін-өзі дамытуға мүмкіндіктері кеңейіп жатқаны қуантады.
– Қауымдастық алдына қандай идеялар мен жоспарлар қойып отыр?
– Жоспар көп, оның барлығы еліміздегі спортты, жекпе-жек өнерін дамытумен байланысты. Алда бізді Қарағандыда Номад ММА бойынша Әлем кубогын, Алматыда киокушинкай-кан каратэден әлем чемпионатын өткізу сияқты біз қатысатын көптеген маңызды спорттық іс-шаралар күтіп тұр.
Қауымдастығымыз кеңейіп келеді, бізге жаңа қатысушылар қосылуда, бұл біздің жұмысымызға деген сұранысты көрсетеді.
Біз неғұрлым көп болсақ, соғұрлым спорт үшін, ел үшін пайдалы істер жасап, спорт саласында өте көп жетістіктерге қол жеткізіп, жарқын жеңістерге жетер едік.
Спорт арқылы тәрбиелеу балаға өте маңызды сезімді сыйлайды – өмір бойы әртүрлі салаларда шыңдарды бағындыруға ықпал ететін өзіне деген сенімді береді. Абай Құнанбаевтың «Өзіңе сен, өзіңді алып шығар, Еңбегің мен ақылың екі жақтап» деген өлең жолдары бар. Спорт пен жекпе-жек өнері есейіп келе жатқан жеткіншек өмірінің өте маңызды өзегін құрайды. Бүгінгі таңда спортпен, жекпе-жек өнерімен айналысудың қолжетімділігі, менің ойымша, біздің қоғам үшін, оның рухани және физикалық жайлы жағдайы үшін өте құнды.
Біздің Қауымдастықтың жұмысы балаларды, жасөспірімдерді және ересектерді салауатты өмір салтын ұстанып, жекпе-жек өнерінің сан алуан түрімен барынша қамтуға өз үлесін қосқанын қалаймын.
Сұрақтарды қойған
Александр ПЕТРУХИН
АННОТАЦИЯ
Ассоциация боевых искусств Казахстана, образованная пять лет назад, объединяет уже несколько десятков федераций восточных и спортивных единоборств, внося свой вклад в приобщение детей, подростков и взрослых к здоровому образу жизни посредством занятий различными видами боевых искусств. Вице-президент – генеральный директор АБИК Абай Батыров рассказывает о деятельности Ассоциации боевых искусств Казахстана и о роли детского и юношеского спорта в воспитательном процессе.
Comments