Алматы қаласында жалпы білім беретін 205 мектепте 20750 бала тегін тамақпен қамтамасыз етілген, деп хабарлайды «Хабар 24».

Алайда, 2015-2016 оқу жылынан бастап жалпы бастауыш сынып оқушыларын тегін тамақтандыру тоқтатылған. Ал, мектептерді материалдық және техникалық жағынан қамтамасыз ету мәселесі толықтай шешілген. Енді келер жылы «Жас маман» республикалық жобасы аясында қаладағы 18 колледжді жабдықтау көзделіп отыр. Демографиялық өсімге және сырттан келушілердің қатары көбейгендіктен, қала мектептерінде 30 мың оқушыға орын тапшы болып отырғаны жасырын емес. «Бұл да алдағы бес жылда кезең-кезеңімен шешіледі», - дейді білім басқармасының басшысы.

Гүлнәр Қожабергенова, қалалық білім басқармасының басшысы:

- Қазір Алматы қаласы бойынша 2020-2025 жылдарға арналған кешенді жоспар құрылды. Ол жоспарда мектептер және балабақшаларды салу қарастырылған. Осы 2020 жылы 8 жаңа мектептің құрылысы басталады. Әрқайсысы 1500 немесе 1800 орыннан орта есеппен алғанда, 12900 орынға 8 мектеп салынатын болады.