![](https://static.wixstatic.com/media/e2150f_269caad0a1024aa3b6d0561e5337da29~mv2.jpg/v1/fill/w_144,h_96,al_c,q_80,usm_0.66_1.00_0.01,blur_2,enc_auto/e2150f_269caad0a1024aa3b6d0561e5337da29~mv2.jpg)
Биыл мектеп түлектері ұлттық бірыңғай тестілеуді 2 рет тапсыра алады. Бұл туралы бүгін ҚР Білім және ғылым вице-министрі Мирас Дәуленов айтты, деп хабарлайды ҚазАқпарат тілшісі.
«Наурыздың 10-ы мен сәуірдің 10-ы аралығында ҰБТ ақылы негізде өтеді. Оған үміткерлер бір рет қана қатыса алады. Ал 15 сәуір мен 30 маусым аралығында ҰБТ тегін болады. Бұл ретте үміткерлер ҰБТ-ны екі рет тапсыру мүмкіндігіне ие. Олар білім гранттарын бөлуге қатысады. Сәуір-маусым аралығындағы ҰБТ-ға биыл мектеп бітіретін 120 мың түлектің қатысатындығы жоспарланған», - деді ол министрліктің аппарат жиналысында.
Оның атап өтуінше, еліміздің өңірлерінде ҰБТ өткізу пунктерінің саны жеткілікті.
Биыл ҰБТ-ны мектеп бітірушілер, өткен жылы орта білім ұйымдарын бітіргендер, кәсіби-техникалық орта білім алғандар, Қазақстан азаматы емес тұлғалар, шетелдердегі білім ұйымын бітіргендер тапсырады.
«Өткен жылы біз оларға ҰБТ-ны пандемияға байланысты қашықтан өткізген едік. Сондықтан оларда ҰБТ-ны электронды форматта тапсыру тәжірибесі бар және бұл олар үшін жаңалық емес», - деді Мирас Дәуленов.
Автор: Марлан Жиембай